前言: 一日情旅嘅宗旨係希望各位豬仔豬女，每星期都可以參考下我哋幫你準備嘅節目，咁就唔使嘥時間左諗右諗啦！ (每星期努力更新)
越來越多一班情侶一齊去露營，可能係因為露營可以令大家完全遠離塵囂，享受私人時間，避免受到外界干擾。但露營始終都有啲辛苦架，如果各位豬仔豬女係露營初哥，又想一齊去試一玩露營的話，今集一日情旅一定好啱你地呀！
出發指南
時間: 14:00
地點: 西貢市中心 --> 萬宜水庫東壩 --> 浪茄灣
所需物品:
露營所需物資
足夠現金
小編個日為左可以避開假日，就平日2:00pm由西貢市中心出發 (大家可以係西貢百佳買齊物資)，但係因為平日冇小巴直去萬宜水庫東壩，所以就坐的士去 (約$130)，再由東壩原路直行上山到浪茄灣。東壩本身亦係一個極具特色同歷史嘅景點，大規模火山岩柱、海蝕洞、防波堤等，經過就順手打埋卡啦！
東壩原路直行上30分鐘左右就會到達浪茄灣 (都有少少上落斜路)，一嚟到就當然係見到個無敵大海景啦，真係水清沙幼、而且冇咩垃圾、其他沙灘真係冇得比！睇完風景就要開始紮營啦，因為小編都唔係咩露營高手，如果大家有需要，可以瀏覽最下方嘅露營教學！
因為小編今次有帶露營用嘅流動燒烤爐，所以就買左包炭去燒嘢食，而浪茄灣本身都有幾個野外燒烤爐，大家可以按需要決定煮嘢食定燒嘢食。小編就買左海蝦、豬扒、醃製三文魚、墨西哥士多啤梨同雞蓉粟米湯等等(小編掛住食，就唔記得影多啲相添)。豬仔負責煮嘢食，豬女負責打卡景相，大家「分工合作」~
如果大家起到身，就千祈唔好錯過睇日出嘅機會，睇到鹹蛋黃慢慢升起，再挨係豬仔膊頭，真係好浪漫呀~ 最後提提大家，要愛護自然環境，帶走自己嘅垃圾，咁樣其他豬仔豬女先可以持續享受到浪茄灣嘅一日情旅架麻，拜拜！
PickMe總評分：7.4分
其他資料
1. 專線小巴9A線直接由來往西貢北潭涌與萬宜水庫東壩，但服務時間只限星期日及公眾假期下午3時至6時
2. 星期六日會比較多人露營，建議提早出發
3. 浪茄灣大機會收唔到電話信號
4. 【露營清單分享】
5. 【露營教學】
https://cutt.ly/Zkx7b2X *歡迎轉載文章
*部分圖片及資料取材自網上