前言: 一日情旅嘅宗旨係希望各位豬仔豬女，每星期都可以參考下我哋幫你準備嘅節目，咁就唔使嘥時間左諗右諗啦！ (每星期努力更新)
今集就會同各位豬仔豬女安排一個影靚相嘅行程，如果有私家相機嘅豬仔就記得要充好電，一齊帶埋過去啦！
PickMe出發指南
時間: 15:00
地點: 西環
所需物品:
有電嘅相機/手機
外套 (傍晚時間或有大風)
坐墊 (如需耍)
大家可以坐地鐵到香港大學站 B2 出口，步行至西區公眾貨物裝卸區，大概所需10分鐘就到架啦。3-4點pm係最好嘅時間，因為大家可以係仲有太陽嘅時間，可以更容易影到冷色系嘅Style，冷色系再配合埋富有性格嘅場景 (竹棚，夾板等)，絕對可以影到同平時唔同嘅感覺。
而去到傍晚5-6點，太陽開始落山，大家可以教返做暖色系，慢慢影下日落，又影下個海景，再坐係碼頭前面，真係好Sweet Sweet 呀。
小編個日就留到7點先走，天開始黑，見到有2個小妹妹係到飲悶酒，飲飲下仲係到喊(應該都係失戀啦)，睇嚟西環碼頭亦不失為一個失戀解悶嘅好地方，希望小妹妹可以快啲搵到Ture Love啦！
到左晚上7點左右，又到左食晚飯嘅時候。今集就會近近哋，帶大家去到同樣係位於西環嘅阿一豬扒酸辣米綫。大家係西環碼頭可以行返出去卑路乍街，大概所需12分鐘就到架啦。
連店名都叫做豬扒酸辣米綫，當然要食佢地嘅招牌酸菜豬扒米線啦。每碗有3大塊肥瘦適中嘅炸豬扒，夠淋夠味；而佢哋啲酸辣唔係話好辣好酸，味道適中，食得辣嘅朋友可以大膽啲叫大辣。而且小編覺得啲米綫都唔同出面大家食開果啲，係比較有煙韌飽肚，特別有新鮮感呀。
另外亦有水晶粉同上海麵可以選擇，上海麵就更飽肚啲，而且食落麵底似係自己整。
食完晚飯飽飽地，如果大家想的話，都可以唔使急住返屋企嘅。大家可以喺附近搵個叮叮站上車，坐住叮叮車，吹著涼風，慢慢享受中西區獨有嘅風格，挨住小豬仔嘅膊頭，享受一個簡單又豐富嘅一日情旅。
PickMe總評分：7.8分
餐廳資料
店名:阿一豬扒酸辣米綫
地址:西環卑路乍街7-11號海都樓地下C1號舖
Open Rice食評: https://cutt.ly/Kjbk4Zn
其他資料
1. 西環貨運碼頭，三面環海，大家可以放狗、拍照、踏單車等。
2. 可以先到天文台查清楚日落時間，避免錯過最佳影相時間。
3. 阿一豬扒酸辣米綫有幾間分店，大家唔好search錯呀！
*部分圖片及資料取材自網上
#影相篇 #西環貨運碼頭