前言：一日情旅嘅宗旨係希望豬仔豬女，每星期都可以參考下我哋幫你準備嘅節目 ╴咁就唔使嘥時間左諗又諗啦！（每星期努力更新）
各位平日返工、返學都已經好攰，有時難得週末放假，當然想瞓返個靚教再好好地同另一半或者朋友「Hea」一個下午啦！今日小編就同大家介紹一間位於荃灣海之戀商場嘅Peko Peko Eartry。
PickMe岀發指南：
時間：14:30
地點：海之戀Peko Peko Eartry
充滿文清氣色嘅裝修風格絕對係唔少女士心目中嘅理想餐廳，餐廳環境十分闊落，有分室內同室外兩邊嘅座位，小編當然極力推介戶外嘅海景座位！
適逢轉春，戶外座位正對住荃灣海濱，下午兩點半哩個時間啱啱好有一絲絲溫暖嘅陽光，迎面間中亦有少許清涼嘅海風，望住靚靚嘅海景食飯，相信可以令到豬仔豬女們短暫地忘記平日嘅煩惱，好好地享受當下舒服同寫意嘅一刻。由於戶外嘅海景座位有限，小編強烈建議豬仔豬女們記得提前預約座位啊。
餐廳主打和洋料理，每一碟都好精致小巧，係美食打卡影相嘅一大重點！小編今次係選擇咗自選下午茶套餐，包括兩個頭盤（和風蛋卷 ＋ 芝士年糕）、一個主菜（野菜蝦天婦羅鳥冬）、和菒子同埋一杯野飲（即磨咖啡），價錢只需 $58，而且餐廳環境優美，絕對係對得起哩個價錢，性價比係非常之高啊！
大約下午四點，食完個靚飯之後，豬仔豬女們可以慢慢咁向荃灣海濱長廊嘅方向行，沿住岸邊向前往珀麗灣嘅渡輪碼頭方向走。之後乘搭四點十五分嘅尾班船入珀麗灣，船程只需十幾分鐘就會順利到達珀麗灣。
啱啱到達珀麗灣碼頭就差唔多時間準備到黃昏，豬仔豬女們可以係瑪頭附近慢慢咁散下步，沿途欣賞返青碼大橋嘅海景。由於柏麗灣屬於私人會所式住宅，附近環境相對地比較寧靜青幽，而且空氣亦都比較清新舒服，豬仔豬仔們可以好好地呼吸一下清新嘅自然氣息。散步嘅同時，天空開始出現粉紫粉嫩嘅顏色，四周昏黃嘅街燈亦都開始亮着，配搭夕陽西下，絕對係浪漫嘅頂點，情侶或者朋友之間拍照嘅大好時機。
回程嘅時候，可以乘搭返巴士到市區。
珀麗灣 - 葵芳 （NR332）
珀麗灣 - 青衣 （NR330、NR330A、Y41）
珀麗灣 - 香港國際機場 （NR334）
Pick Me 總評分： 8.2分
餐廳資料
店名: Peko Peko Eartry
地址: 荃灣大河道100號海之戀商場1樓1006-1007號舖
其他資料
1. 荃灣碼頭往珀麗灣渡輪訪客成人收費 $12.0（去程）
2. 荃灣碼頭往珀麗灣渡輪服務時間表，船程約為10 -15分鐘
*部分圖片及資料取材自網上